Օգոստոսի 20-ից 27-ը Սվետլոգորսկում (Ռուսաստան, Կալինինգրադի մարզ) կազմակերպվել է «Հիշողության քաղաքականությունը հետխորհրդային տարածքում. հիմնական մոտեցումներ և պրակտիկա» երիտասարդ պատմաբանների միջազգային դպրոցը։ Միջոցառման հիմնական նպատակն էր վերլուծել հետխորհրդային տարածքում հիշողության քաղաքականության ոլորտի առանցքային միտումները։ Քննարկման առանցքում հիշողության քաղաքականության տարածաշրջանային առանձնահատկություններն էին։ Դպրոցի ընթացքում մասնակիցների հետ զրուցեցին տասնյոթ առաջատար փորձագետներ Ռուսաստանից, Բելառուսից և Հայաստանից:
Հայ-Ռուսական համալսարանի քաղաքագիտության ամբիոնի դոցենտ Նորայր Դունամալյանը որպես հրավիրյալ բանախոս հանդես եկավ դասախոսությամբ՝ «Պատմական հիշողությունը Հարավային Կովկասում. աշխարհայացքների բախո՞ւմ, թե՞ տարածաշրջանի ընդհանուր պատմություն» թեմայով։ Ն.Դունամալյանը ներկայացրեց Հարավային Կովկասի երկրներում հիշողության քաղաքականության ձևավորման և զարգացման հիմնական միտումները՝ նշելով հետխորհրդային տարածքի այլ տարածաշրջանների հետ որոշ ընդհանրություններ։
«Հետխորհրդային սոցիալ-հումանիտար տարածության շարունակվող փլուզման ֆոնին կարևոր է այնպիսի միջոցառումների անցկացումը, որոնք բացահայտում են երբեմնի մերձավոր երկրների հիշողության ժամանակակից քաղաքականության էությունը։ Անհրաժեշտ է նաև հաղթահարել կարծրատիպերն ու թյուրըմբռնումները Ռուսաստանի Դաշնության և հետխորհրդային տարածքի այլ երկրների գիտական համայնքների միջև»,- նշեց փորձագետը։ Բանախոսը նաև ներկայացրել է գիտական խմբի աշխատանքների արդյունքները:
Միջազգային դպրոցի կազմակերպիչներն էին Ռուսաստանի Դաշնության Գիտության և բարձրագույն կրթության նախարարությունը և Իմանուել Կանտի Բալթյան դաշնային համալսարանը։ Ավելի քան 40 ուսանող և երիտասարդ գիտնական Հայաստանից, Բելառուսից, Ռուսաստանից, Ինդոնեզիայից, Բուլղարիայից, Սերբիայից, Ղրղզստանից, Տաջիկստանից և Ղազախստանից դարձան դպրոցի մասնակիցներ։ Միջոցառման հիմնական թեմաներն էին հիշողության բախումները Մեծ Եվրասիայում, «մնեմոնիկ հակամարտությունների» լուծման ուղիները, հետխորհրդային տարածքում անցյալի ազգային հասկացությունների հարցերը, պատմության կեղծմանը հակազդելը և պատմության հանրահռչակումը սոցիալական ցանցերում և լրատվամիջոցներում:
